Shumë profesionistë të rinj apo freelancerë bien në grackën e klientëve “të lirë”. Në fillim duket si mundësi e mirë për të fituar eksperiencë, për të ndërtuar portofol ose për të pasur një projekt më shumë në listë. Por e vërteta është që klientët që kërkojnë shërbime me çmime shumë të ulëta, zakonisht ju kushtojnë më shumë kohë, energji dhe humbje financiare sesa mendoni.
Pse ndodh kjo?
- Kërkesa pa fund – Klientët e lirë zakonisht kërkojnë shumë më tepër seç paguajnë. Ata duan ndryshime pafund, shtesa që nuk janë pjesë e marrëveshjes dhe shpesh nuk kuptojnë kufijtë profesionalë.
- Mospërfillje e kohës suaj – Për ta, puna juaj nuk ka vlerën e duhur sepse nuk kanë investuar realisht. Kjo i bën të mos e respektojnë afatin kohor, orët e punës apo edhe komunikimin.
- Rreziku financiar – Shumë prej tyre vonojnë pagesat ose e kanë të vështirë ta respektojnë marrëveshjen financiare. Ju humbni kohë duke ndjekur pagesa të vogla që nuk ja vlejnë.
- Stresi dhe lodhja – Përpjekja për të kënaqur një klient që s’është i gatshëm të paguajë për cilësinë, vetëm ju sjell stres dhe zhgënjim. Në vend që të përqendroheni te klientët që e vlerësojnë punën tuaj, mbeteni duke u marrë me ankesa dhe kërkesa të paarsyeshme.
- Humbje e mundësive të mira – Koha që shpenzoni me një klient “të lirë”, mund të shfrytëzohej për të punuar me klientë seriozë që paguajnë më shumë dhe ju japin vlerë reale.
Si të shmangni klientët e tillë?
- Vendosni çmim minimal për shërbimet tuaja dhe mos e ulni vetëm për të fituar një projekt.
- Shkruani gjithmonë një marrëveshje të qartë që përfshin numrin e rishikimeve, afatet dhe pagesën.
- Mësoni të thoni jo kur një klient nuk është i gatshëm të vlerësojë punën tuaj.
- Fokusi juaj duhet të jetë tek klientët që kuptojnë se cilësia ka kosto, dhe janë të gatshëm të paguajnë për këtë.
Në fund, kujtoni: më mirë pak klientë të mirë, sesa shumë klientë të lirë. Ata që paguajnë më pak, shpesh ju kushtojnë më shtrenjtë në kohë, energji dhe humbje të mundësive.