Shumë pyetje intervistash për pozitën e kamarierit në restorant janë të fokusuara në komunikimin me klientin, situatat e vështira, punën në ekip, dhe sjelljen në punë. Më poshtë i ke disa nga pyetjet më të zakonshme – bashkë me sugjerime për përgjigje profesionale që lënë përshtypje të mirë:

1. Na trego pak për veten.

Si të përgjigjesh:

Jam një person i komunikueshëm dhe i përkushtuar në punë. Më pëlqen të punoj me njerëz dhe të krijoj një përvojë të këndshme për klientët. Kam përvojë (ose dëshirë të madhe) për të punuar në ambientet e restoranteve dhe gjithmonë përpiqem të jem i sjellshëm, i pastër dhe i organizuar në çdo ndërrim.

2. Pse dëshiron të punosh si kamarier?

Si të përgjigjesh:

Më pëlqen të punoj me njerëz dhe të jem pjesë e një ekipi. Shërbimi i klientit është diçka që më motivon dhe më jep kënaqësi. Më pëlqen të sigurohem që klientët të ndihen të mirëpritur dhe të marrin një shërbim cilësor.

3. Çfarë do të bëje nëse një klient ankohet për ushqimin apo shërbimin?

Si të përgjigjesh:

Do ta dëgjoj me kujdes klientin pa e ndërprerë dhe do të kërkoj ndjesë për shqetësimin. Pastaj do të informoj menjëherë menaxherin ose kuzhinierin për të gjetur një zgjidhje sa më të shpejtë dhe të kënaqshme për klientin.

4. Si e përballon presionin kur restoranti është plot?

Si të përgjigjesh:

Në situata të ngarkuara mundohem të ruaj qetësinë dhe të jem i organizuar. I jap përparësi komunikimit të mirë me kolegët dhe klientët, dhe përpiqem të jem efikas pa bërë gabime. Puna në ekip në ato momente është çelësi.

5. A ke përvojë me përdorimin e POS-it (sistemi elektronik për porosi)?

Nëse po:

Po, kam përvojë me përdorimin e POS-it dhe jam i shpejtë në marrjen dhe futjen e porosive.

Nëse jo:

Ende jo, por jam i gatshëm të mësoj. Kam aftësi të mira në përdorimin e pajisjeve digjitale dhe mësoj shpejt.

6. Si do të përshëndesje një klient që sapo ka hyrë në restorant?

Si të përgjigjesh:

Do t’i afrohem me buzëqeshje dhe do të them: “Mirë se vini! A dëshironi të uleni brenda apo në tarracë? Ju lutem, më ndiqni.”
Është shumë e rëndësishme të bëj klientin të ndihet i mirëpritur që në fillim.

7. Çfarë mendon se është një kamarier i mirë?

Si të përgjigjesh:

Një kamarier i mirë është i sjellshëm, i pastër, i organizuar dhe ka aftësi të mira komunikimi. Ai/ajo është i vëmendshëm ndaj nevojave të klientit dhe punon mirë me ekipin për të siguruar një përvojë të mirë për klientin.

8. Si do të sillesh me një klient të huaj që nuk flet shqip?

Si të përgjigjesh:

Do të përdor fjalët bazë në anglisht që i kam mësuar, si përshëndetjet, marrja e porosisë, dhe falënderimi. Nëse është e nevojshme, do të kërkoj ndihmën e një kolegu që flet më mirë anglisht, por gjithmonë do të jem i sjellshëm dhe pozitiv.

9. Si e mban pastërtinë dhe higjienën gjatë ndërrimit të punës?

Si të përgjigjesh:

Gjithmonë kujdesem për higjienën time personale: uniformë e pastër, flokët të lidhura (nëse janë të gjata), pastërtia e duarve. Gjithashtu mbaj tavolinat dhe mjetet e punës të pastra dhe të dezinfektuara.

10. Kur mendon se është koha më e mirë për të pastruar tavolinën e klientit?

Si të përgjigjesh:

Menjëherë pasi klienti të mbarojë ushqimin ose largohet nga tavolina. Gjithmonë kontrolloj që tavolina të jetë e pastër për klientin tjetër, pa u vonuar.

Shikoi këtu të gjitha mësimet për t’u bërë një kamarier i suksesshëm