Delegimi dhe dhënia e detyrave mund të duken të ngjashme, por në thelb janë dy gjëra shumë të ndryshme. Kuptimi i këtij dallimi është çelësi për të qenë një udhëheqës efektiv.
DALLIMET KRYESORE
| Elementi | Delegimi | Dhënia e detyrave |
|---|---|---|
| Qëllimi | Zhvillimi i ekipit dhe çlirimi i kohës për menaxherin | Përfundimi i një detyre specifike |
| Përgjegjësia | Delegohet edhe autoriteti, por mbetet përgjegjësia | Jepet vetëm përgjegjësia për detyrën, jo autoriteti |
| Autonomia | Personi ka liri për të vendosur si ta kryejë punën | Personi ndjek udhëzime të qarta, pa liri vendimmarrjeje |
| Marrëdhënia | Bazohet në besim dhe ndërtim të kapaciteteve | Bazohet në instruksione dhe kontroll |
| Fokusi | Rezultati afatgjatë dhe zhvillimi personal i ekipit | Rezultati afatshkurtër dhe përfundimi i një pune |
Shembull:
- Dhënie detyre: “Printoje këtë raport dhe më sill.”
- Delegim: “Nga sot do të jesh përgjegjës për përgatitjen dhe dorëzimin e raporteve javore. Të tregoj si bëhet herën e parë dhe pastaj ti vendos mënyrën më të përshtatshme për ty.”
Kujdes:
Shumë menaxherë besojnë se po delegojnë, por në fakt vetëm po shpërndajnë punën. Delegimi i vërtetë ndodh kur i jep dikujt mundësinë të vendosë, të rritet dhe të ndjejë përgjegjësi për rezultatet.
Detyrë reflektimi për këtë mësim:
- Kujto një situatë ku i ke caktuar një punë dikujt.
- A ishte delegim i vërtetë apo thjesht dhënie detyre?
- Çfarë do të bëje ndryshe sot?